حكم الوصية و الوصية الواجبة في مصر

 

اسئلة كتير بتتسأل في موضوع الوصية و بتكون معظم الاجابات عليها غير محددة و مشتتة للمتسائلين زي .. "ايه هي الوصية؟؟ " " و ايه هي شروطها ؟؟ " "و ايه الفرق بين الوصية و الوصية الواجبة ؟؟"  " طب ازاي بتتكتب الوصية ؟"  "و امتى المنتفع من الوصية يضمن حقه من باقي الورثة ؟؟ " و غيرها من الاسئلة الكتير المتعلقة بهذا الموضوع عشان كدة جمعنا لكم الاسئلة الشائعة الخاصة بالوصية و الوصية الواجبة .

أولا :ايــــه هي الوصية ؟ 

ثانيا : ايه هي شروط الوصية في الشريعة الاسلامية و القانون المصري ؟

ثالثا : الوصية الواجبة - ايه هي الوصية الواجبة ؟؟

رابعا : نقاط هامة لازم تعرفها و اجابات اسئلة شائعة 

أولا :ايــــه هي الوصية ؟  

الوصـــــية هي تصرف بيصدر من المالك (المورث) في  امـــواله او ممــتلكاته و بيكون مستحق للمنتفع (الموصى إليه) إلى ما بعد وفاته . 

ثانيا : ايه هي شروط الوصية في الشريعة الاسلامية و القانون المصري ؟ 

مبدأيا لازم نعرف ان احكام الوصية في القانون المصري لا تختلف عن احكامها في الشريعة الاسلامية و ده لأن القانون المصري بيطبق احكام الشريعة الاسلامية في احكام الوصية لأنها من مسائل الأحوال الشخصية , اما بالنسبة لشروط الوصية فهي كالتالي :

لازم تكون الوصية صادرة من شخص كامل الاهلية يعني لازم يكون فوق سن 21 سنة و لازم ما يكونش مريض بالجنون او العته او السفه او الغفلة 

لازم يكون المنتفع بالوصية (الموصى إليه ) معين بالإسم يعني ما يكونش شخص مبهم .

لازم تكون الوصية في حدود لا تتجاوز ثلث التركة .

لازم تكون الوصية موثقة  , و القانون مش بيشترط صيغة معينة للوصية تتكتب بيها غير انها تكون واضحة و موثقة.

لازم يكون الموصى به ( محل الوصية ) مما يجوز التعامل عليه و انه يكون مملوك للموصي يعني ما ينفعش الوصية تكون في مخدرات او في اي شيء غير قانوني , و كمان ماينفعش تكون الوصية في عقار مثلا غير مملوك

للموصي من الأساس . 

ثالثا : الوصية الواجبة - ايه هي الوصية الواجبة ؟؟

كثير جدا نجد ان الولد او البنت بيتوفوا في حياة ابوهم و امهم و احيانا كثيرة بيكون عند هؤلاء المتوفين اولاد (الأحفاد) , فعندما يتوفى الأجداد و عند تقسيم تركتهم  على الورثة نجد ان الميراث بيتحرم منه الأحفاد نظرا لأن ابوهم او امهم توفوا في حياة (الأجداد) , و اللي كان بيحصل انه كنا  نجد ان هناك فجوة كبيرة بين الأوضاع المادية للأحفاد (الذين توفوا آبائهم في حياة الأجداد ) و باقي الأحفاد فيما بعد , و عشان كدة هنا تدخل الشرع و القانون بما يسمىب " الوصية الواجبة" عشان يعطي لهؤلاء اليتامى نصيب آبائهم او امهاتهم في تركة الأجداد حتى يحصلوا على نصيبهم الشرعي من قسمة الميراث في التركة و لكن تحت مسمى "الوصية الواجبة " , و ده حق قانوني إلزامي بتقضي به محكمة الأسرة عند استخراج اعلام الوراثة . 

رابعا : نقاط هامة لازم تعرفها و اجابات اسئلة شائعة 

 طالما انك بتقرأ هذا المقال يبقى بالتأكيد عندك الكثير من التساؤلات حول هذا الموضوع و عشان كده حنعرض بعض الأسئلة الشائعة و اجاباتها المتعلقة بالنقاط السابقة .

س 1 : ايه هو القانون الذي ينظم موضوع الوصية ؟

ج : هو القانون رقم 71 لسنة 1946

س 2 : ازاي بيتم توثيق الوصية و الوصية الواجبة ؟

ج : الوصية بيتم توثيقها في مكاتب الشهر العقاري اما الوصية الواجبة فهي بتكون مذكورة في إعلام الوراثة و بيحكم بيها قاضي الوراثات عندما يتم تقديم اسماء أبناء المتوفى صاحب اعلام الوراثة .

س 3: هل الوصية بيكون لها صيغة معينة ؟

ج : لا , و لكن يشترط فقط تكون موثقة كما اشرنا في الشهر العقاري . 

س 4 : ايه هو اقصى مقدار للوصية ؟

ج : اقصى مقدار ممكن يوصي به الشخص هو ما يساوي ثلث التركة .  

س 5 : طب ايه هو مصير ما يزيد عن ثلث التركة في الوصية ؟ 

ج : لازم باقي الورثة يوافقوا عليه كتابة و لازم يكونوا كاملي الأهلية عشان الموافقة تكون قانونية . 

س 6 : ايه هي الأشياء التي ممكن ان تكون محل الوصية ؟ 

ج : كل ما هو قانوني و مملوك لصاحب الوصية " الموصي"

س7 : طب ما هو مصير الوصية في حالة لو توفى المنتفع بها " الموصى إليه " ؟

ج : تعتبر الوصية لاغية . 

س 8 : ايه هو مصير الوصية في حالة لو تم التصرف في الشيء محل الوصية او هلاكه " الموصى به " ؟

ج : تعتبر الوصية لاغية .

س9 : ايه هو مصير الوصية لو كان الموصي سفيها او في حالة سكر او تحت اكراه او كان في مرض جنون ؟

ج : تعتبر الوصية قابلة للبطلان بشرط اثبات ذلك . 

س 10: ما هو مصير الوصية لو كان الموصي في مرض الموت ؟ 

ج : تعتبر الوصية صحيحة .

س 11 : ماذا لو لم يتم ذكر الابن المتوفي في التركة لحرمان ابنائه ( الأحفاد ) من الوصية الواجبة ؟ 

ج : يعتبر ذلك تزوير معنوي في حق مقدم إعلام الوراثة و يستوجب عقوبة جنائية .  

س12 : ايه هي الحالات التي يجب بها الوصية الواجبة ؟ 

ج : حنتكلم عن حالتين

الحالة الأولى : لو توفى الأبن في حياة ابيه او امه فهنا ابناء الابن المتوفي بيستحقوا نصيبهم في ابيهم المتوفي من تركة الجد و الجدة تحت مسمى" الوصية الواجبة " 

الحالة الثانية : لو توفت البنت في حياة ابيها او امها فهنا ابناء البنت المتوفية بيستحقوا نصيبهم في امهم المتوفية من تركة الجد و الجدة تحت مسمى " الوصية الواجبة " و لكن بشرط ان يكونوا من  الفرع الأول لها فقط يعني ابنائها فقط و ليس ابناء ابنائها .

 س13 : هل ممكن للمنتفع بالوصية " الموصى إليه " ان يرث ؟ و ما معنى حديث " لا وصية لوارث " ؟

ج :  في الشريعة الإسلامية اختلف الفقهاء في جواز وراثة الموصى إليه و لكن دار الإفتاء المصرية  حسمت هذا الخلاف بأن ان الأصل لا يجوز ان يوصي الشخص لأحد اولاده بنصيب اكبر من اخواته و يفاضل بينهم إلا بإستثناء لو ان هناك عذر يستوجب احد الأبناء عن غيرهم , اما في القانون المصري فالمشرع اجاز ان يرث المنتفع بالوصية " الموصى إليه " بشرط ان تكون الوصية في حدود الثلث . 

س 13 :  ما هي المحكمة المختصة في امور الوصية ؟ 

ج : محكمة الأسرة .

 

بقلم المحامي / أ. محمد رفيق إبراهيم 

أحصل على 15 دقيقة أستشارة مجانية مع محامى.