عقد بيع سيارة (اشياء لازم تحذر منها  قبل بيع او شراء سيارة)

عدد السيارت وصل في جمهورية مصر العربية إلى 12 مليون سيارة و العدد ده بيزيد بمعدل 750 ألف سيارة سنويا , وللأسف بيزيد معاه المشاكل القانونية نتيجة عدم الوعي الكافي لدى المشتري أو البائع , و عشان كدة حنحذرك من أهم الأشياء اللي لازم تحذر منها لما تيجى تشترى او تبيع سيارتك .

 

 

أولاً : ايه هو سبب المشاكل ؟ 

 

ثانيا : مشاكل قانونية عليك تفاديها في حالة لو كنت بائع للسيارة : 

 

ثالثا: مشاكل قانونية عليك تفاديها لو كنت مشتري للسيارة :

 

أولاً : ايه هو سبب المشاكل ؟ 

 

في البداية نحب ننصح ان اي احد مقبل على شراء يجب عليه ان يقوم بعملية الكشف عليها و فحصها جيدا في احد مراكز الصيانة عشان يطمئن من ناحية الأعطال التقنية و جسم السيارة , و طبعا لازم تتأكد في مركز الصيانة من مطابقة كلاً من رقم الموتور المسجل على الرخصة و رقم الشاسيه  أنه مطابق لرقم الموتور ورقم الشاسيه الموجودين في صدر السيارة و دي حاجة بيقوم بيها مهندس الصيانة عند فحصه لسيارتك .

 

و هنا احنا هنبدأ نذكر اغلب المشاكل القانونية اللي بتحصل بسبب شراء أو بيع السيارات عشان تتفاداها و تحمي نفسك من نصب التجار أو إهمال الطرف الثاني , و حنقسمهالكم كمان للمشاكل القانونية اللي ممكن تقابلك كبائع للسيارة او كمشتري لها .

 

ثانيا : مشاكل قانونية عليك تفاديها في حالة لو كنت بائع للسيارة 

 

للأسف اغلب بائعي السيارات مش بيهتموا إطلاقاً بالمشاكل القانونية اللي ممكن تواجههم في حالة الإهمال في بيع سياراتهم من الناحية القانونية و بيصبوا تركيزهم فقط على إستلام المبالغ النقدية مقابل السيارات المباعة و" ياخد بعضه و يجري " و بعد كده يفاجئ بأن عليه قضية  "جنحة تبديد لوحات معدنية" و يتبهدل بين المرور و المحاكم عشان يخلص منها و بعدين يرفع قضية " محو بيانات " عشان يتأكد ان الفيش الجنائي عنده نظيف ف يعرف يسافر او يشتغل .

 

و عشان كدة احنا ح نهديك بخطوات لازم تتبعها بالتفصيل عشان تأمن نفسك من أي مشاكل قانونية ممكن تواجهك - لا قدر الله - في حالة لو كنت بائع للسيارة . 

 

 

لازم تبيع السيارة بعقد مسجل في الشهر العقاري و ماتسمعش كلام المشتري لما يقولك " اعملي توكيل " عشان يستفيد بالمدة المتبقية في رخصة القيادة , لأن ده بيعرضك انك تبقى مهدد تحت رحمته لأنه في حالة لو لم يقوم بتجديد رخصة السيارة المباعة ( سيارتك سابقا ) و نقل ملكيتها باسمه فهنا حضرتك هينزلك جنحة " تبديد لوحات معدنية " و تفاجئ بتنفيذ الأحكام بيخبطوا على باب بيتك عشان تقضي معاهم عقوبة جنحة قد تصل لثلاثة أشهر

 

 

لازم تحتفظ بصورة من عقد البيع المسجل بالشهر العقاري و صورة بطاقة المشتري عشان برضه لو أهمل في تجديد الرخصة ونقل الملكية يكون معاك ما يثبت انك قمت ببيع السيارة بالفعل و انتهت ملكيتك لها بعقد موثق من الشهر العقاري .

 

 

لازم تخلي المشتري يمضي إقرار ( بجانب العقد المسجل بالبيع و الموثق بالشهر العقاري ) أنه استلم السيارة في ساعته و تاريخه عشان لو - لا قدر الله - قام بأي عمل غير مشروع او جريمة أو عمل غير قانوني بالسيارة فهنا انت بتخلي مسئوليتك منها لأن السيارة في نظر الدولة لا زالت مسجلة بإسمك .

 

 

اخيرا احرص على استلام المبلغ المقابل لبيع سيارتك في البنك عشان تضمن انها كاملة وغير مزورة .

 

 

ثالثا: مشاكل قانونية عليك تفاديها لو كنت مشتري للسيارة 

 

في البداية نحب ننوه ان العقد الابتدائي في عملية بيع السيارات ليس له أي قيمة في الإثبات أو في نقل ملكية السيارة و للأسف ده أصبح عرف أن المشتري بيقوم بدفع عربون للبائع و يكتبوا عقدين ابتدائي و بعد كده ممكن يفاجئ بعملية نصب تمت و يستعوض ربنا في العربون المدفوع و للأسف بيكون من الصعب إثبات ذلك ايضاً .

 

و عشان كده ح نهديك بخطوات لازم تتبعها بالتفصيل عشان تأمن نفسك من المشاكل القانونية اللي ممكن تواجهك اثناء شرائك للسيارة و ده طبعا في حالة لو كانت سيارة مستعملة لأن السيارات الحديثة ( الزيرو ) نادراً ما يكون هناك مشاكل قانونية تتعلق بها .

 

احرص على انك تقوم بالكشف على السيارة في أحد مراكز الصيانة المعتمدة عشان تتأكد من خلوها من عيوب تقنية أو من عيوب او غش في جسم السيارة و لازم تتأكد كويس جدا من رقم الشاسية و رقم الموتور الموجود في صدر السيارة و أسفل الموتور لأن كثير جدا بيكون البائع قد قام بتغيير الموتور دون وجود ورق له أو بدون ان يكون مثبت على الرخصة و بعدين تفاجأ اثناء فحص السيارة بالموضوع ده و تبدأ تشتري موتور جديد و تدفع مبلغ و قدره و ده طبعا بغض النظر عن العناء في ذلك و تأخير الترخيص لمدة قد تصل لأشهر , أما في حالة لو رقم الشاسية نفسه مختلف عن الرقم بالرخصة ف ده معناه ان السيارة قد تكون مسروقة او الرخصة مزورة و ده قد يؤدي إلى التحفظ على السيارة في وحدة المرور أو أقرب كمين شرطي و بكده تكون تعرضت لعملية نصب محترمة , و عشان كدة لازم تتأكد من مطابقة رقم الشاسية و رقم الموتور مع ما هو مثبت بالرخصة عن طريق أحد مراكز الصيانة المعروفة .

 

 

احرص على أن تقوم بدفع مبلغ مقابل النقود بالبنك بعد ان تقوم بإستلام عقد بيع السيارة المسجل بإسمك و طبعا العرف السائد أن البائع بيسلمك العقد في البنك مع استلامه للنقود .

 

 

أما في حالة لو قمت بشراء السيارة عن طريق توكيل بيع للنفس او للغير ( و ده احنا مش بننصح بيه ) ف لازم تتأكد ان التوكيل مكتوب فيه " لا يلغى إلا بحضور الطرفين " .

 

 

بعد ان تقوم بدفع المبلغ في البنك احرص على انك تستلم من البائع إقرار بإستلام المبلغ النقدي منه عشان ما يرجعش و يطالبك بيه أو ينكر استلامه منك و ده بيكون طبعا مؤكد لعقد البيع المسجل بالشهر العقاري أو للتوكيل . 

 

 

احرص على انك تستلم من البائع شهادة من المرور بعدم وجود مخالفات مسجلة على السيارة بشهادة حديثة بيوم عملية الشراء .

 

 

و ده لينك ح يساعدك في معرفة ذلك من موقع المرور المصري 

 

https://ppo.gov.eg/webcenter/portal/PPOPortal/pages_publicservices/trafficservices

 


احرص على انك تستلم من البائع مفتاح السيارة ( الإستبن ) و أصل الرخصة و صورة بطاقته تحسبا لأي شيء فيما بعد.

 

احرص على نقل ملكية سيارتك و تجديد الترخيص في الميعاد المحدد و التأكد من وجود الملصق الإلكتروني الخاص بالسيارة حتى لا تعرض نفسك للمسائلة القانونية .

 


بقلم المحامي / أ. محمد رفيق إبراهيم 

Contact us on whats app